NAFARROAKO 3D TXAPELKETA

Gaur ospatu da San Adrianen Nafarroako 3D Txapelketa, Ordiziako lagunen bidez jakin genuen honen berri, eta gu beti halako lehiaketetan parte hartzeko gertu gaudenez han izan gara.

Goizeko 6etan genuen hitzordua Mikelekin, Oihana ta biok joan gara bere bila ta gaizkiulertu baten ondorioz, kontrako lekuan egon gara zain. 6:35 alderako Beasaingo gasolindegi batean Ordiziarrekin elkartu behar ginen, lehenengo aldia izan baita San Adrianera joaten ginena. Han agertu dira Jesusen Mercedesean 5 arkulari, eta atzetik Ilderen furgonetan beste 7. Autobidetik joan gara Tafallaraino, han Peralta alderuntz hartu, eta obra batzuengatik moztuta zeuden kaleetan galdu xamar ibili ondoren iritsi gara San Adrianera.

Berandu iristeak berotzeko denbora gutxitu digu, hori gero igarri egin dut lehenengo ibilbidean. Ibilbidea bat izan da, lehenengo aldian egurrezko piketatik bota dugu, eta bigarrenean aldiz plastikozkotik. Taldean Antonio, Irune, Andres, Imanol eta ni neu, eta Cady bezala Imanolen emaztea eta Oihana.

Ibilbidea oso polita, gora-behera askorekin, tiro luze eta teknikoekin. Lehenengo 10 dianetan, ni neu oso gaizki, gero gorputza berotuz joan denean asko hobetu dut. Amaitu eta han zeuden Arco Ribera taldekoak guretzako bokadilo, pasteltxo eta urarekin zain.

Bigarren itzulia hastea kostatu zaigu benetan, talde batzuen zain egon baikara. Gorputza hobeto zegoen, eta emaitzetan igarri dut. Plazer bat da Andres eta Antonio bezalakoekin patruilan botatzea, dakitenei kasu egin behar zaie ikasten joateko. Irunek ere uste dut Andresekin asko ikasi duela gaur.

Amaitu dugunean Ordiziakoekin batera Peraltako jatetxe batean jan dugu, arratsaldeko 4rak aspaldi jota zeuden, eta nahikoa egin dute guri plater konbinatu batzuk ateratzen. Bazkalosteko tertuliaren ostean, martxa etxe aldera. Itzulerako bidea Lizarratik egin dugu, handik Agurain aldera eta gero Gasteiztik Oñatira. Euria ere dezente egin digu gainera. Orain egun gogor eta betegarri honen ostean, lo egitea tokatzen da.