San Jesus Karratu

Atzo antolatu zuen Ordiziako Arkunatura taldeak beraien santu patroiaren izena daraman lehiaketa, San Jesus Karratu saria hain zuzen ere.

Oñati aldetik Iñaki, Rafa eta hirurok joan ginen botatzera, ta Mikel berriz ikustera etorri zen. Gaintzara iritsi ginenerako kotxe pilatxoa zegoen bide ertzean. Arkuak gertatu, eta txabolaruntz abiatu ginen.

Jente ezaguna agurtu, batenbatzuk berri samarrak ziren, beroketak egin eta lehiaketa hasi zen. Nirekin batera Mikel eta Alfredo donostiarrak, eta Jose Mari errioxarra, azken unean Agustinen baja izan genuen, beraz laukotean aritu ginen. Umore ona izan genuen nagusi taldean. Berrikuntza batzuk zituen lehiak, animali bakoitzari 2 piketa desberdinetatik bota behar zitzaion, eta 20 animalietatik 2 mugikorrak ziren, basurde bat eta untxi bat. Orokorrean animaliak urrun zeuden, baina tiro guztiak oso politak iruditu zitzaizkidan.

Puntuazioa, exkax. Entrenamentu falta, lo gutxi eginda, ez dago aitzakiarik. Jose Mari oso ongi aritu zen, podiuma zapaldu zuen gainera. Alfredok ere remontatu egin zuen. Oñatiarron aldetik aipatu behar Iñakik izugarrizko pleno bat egin zuela, emozionatu egin zen antza, baina niretzat meritu handiagoa dauka Jose Marik puman egin zuen plenoa, zegoen distantziagatik, eta bisore gabe botatzeagatik.

Amaieran otartekoa, ederra zegoena, bizikletekin etorri zirenei denboralditxoa itxaron, eta sari banaketa egon zen. Sari bezala jarri zituzten "trofeoak" originalak eta politak ziren, Ildek egindako 2 animali ere bazeuden sari bezala, bat zozketa bidez Mikel Jareñori egokitu zitzaion, eta bestea aldiz puntu gutxien egin zuen helduarentzako izan zen, Axen izan zen zorteduna.

Urtarrilean guztiok elkar ikusiko dugulakoan, hemendik Mila Esker Ordiziako taldeari egindako guztiagatik.

Iñakik ateratako argazkiak ikusteko, egin klik hemen.


ZORIONAK TA URTE BERRI ON!!!

Blanqueforteko argazkiak

Esaten den bezala, hobe da berandu inoiz baino. Aurtengo udan Blanqueforten ateratatako argazkiak gure picasako albumean ditugu. Ea gustokoak dituzuen...

Blanquefort

Taldeko gora-beherak

Arku tiroa, honetan ari garen guztiok ondo dakigun bezala, jende gutxik egiten duen kirol bat da. Oñatiko taldea orain dela ia 8 urte sortu genuen, inoiz ez gara talde handi bat izan jente kopuruagatik edo lortutako emaitzengatik. Asko jota hamabost kide izan gara taldean batera, pasatu den jende guztia batuz gero, gehiago izango gara, baina ez askoz gehiago.

Une honetan, taldean zazpi heldu eta lau haur gaude, Enaitz gehituta bost. Helduen artetik bost aritzen gara lehiaketetan parte hartzen eta entrenatzen, beste biak ez dakigu bizi direnik ere. Haurretatik bat txikiegia da oraindik parte hartzeko, eta beste batek ez dauka lizentziarik oraindik. Baina haur hauek izango al dira taldearen arnas berria? Egin klik hemen gure harrobiaren argazkiak ikusteko!

Harrobiaz gain, familiara gehitu diren azkenengo kideak ikusiko dituzue.

2007ko Gipuzkoako Areto Txapelketa

Asteburu honetan jokatu da Donostiako Diarco taldearen lokalean aurtengo Aretoko txapelketa. Atzo poleadunak eta tradizionalak, eta gaurkoan biribilduak. Ni atzo egon nintzen, gainera taldeko partehartzaile bakar bezala, Oihana eta beste bi lagun ere ikusle bezala egon ziren arren, Oihana amaierararte eta lagunak berriz azkar aspertu ziren.

Tradizional mailan 2 talde ziren nagusi, Diarco eta Ordizia, eta hamairu partehartzaileak betetzeko ni Txantxiku taldetik. Ez nuen espero bezain ondo bota, nahiz eta bigarren txandan emaizak hobetu nituen. Final laurdenetan Diarcoko Carlosen aurka egokitu zitzaidan, amaieran txapeldun irten zuena, puntu bakarragatik gelditu nintzen kanpoan.

Gu gustora aritzen garen eremua basoa da, beste giro bat izaten dugu. Atzo adibidez isilago artizeko agindu zigun epaileak.

Datorren igandean basora itzultzen gara, Ordiziarrek San Jesus Cuadrado saria antolatu dute, aspaldiko partez baso eder hori zapaltzeko aukera izango dugu, orduan ere taldekide gehiago izango gara, Rafa, Iñaki eta hirurok, ezerk ez badu eragozten behintzat.

2007-08 Basoko Euskal Liga hasi da

Atzo jokatu zen Legutianon aurtengo denboraldiko basoko lehen jardunaldia, Gure taldetik bi berritasun, Joseba lehenbiziko aldiz botatzera, eta taldeko txikia, Adri, ikustera. Oraindik ezin du bota adinagatik, baina guztioi erakutsi digu entrenamentuetan arkulari on bat izan daitekela. Bi kotxetan joan ginen, Rafarekin Intz eta Adri, eta nerekin Iñaki, eta Joseba. San Prudentzion Oihana jaso eta Araba alderuntz abiatu ginen.

Behelainoa beheraino sartuta, jente ezaguna agurtu, eta guztion komentarioetan egiten zuen hotza nagusi. Kikek esan zigun behelainoa kentzeko haizegailuak laster jarriko zituztela martxan, eta egia esan nahiko azkar desagertu zen. Basur oraingoan epaile lanetan, guk behintzat ez genuen arazorik eduki material kontrolean.

Lehenbiziko aldiz, Oihana eta biok patruila berean, Adri txikiak gurekin etortzea erabaki zuen, hasieran lotsatuta, baina gero guztien lagun egin zen. Askorentzako Oihana edo nere iloba zen, guztiei azaldu behar nor zen mutikoa. Bi mutil bizkaitar, Jon eta Xabat, eta donostiar beterano bat, Matias, ziren gurekin batera. Hasierako dianara heltzea apur bat kostatu zitzaigun, izugarrizko itzulia eman baikenuen.

Ibilbidea ondo zihoan, tiro politak, "gauean eroritako arramak" piketa inguruan, zuhaitz gaineko hontza,... halako batean, basurde bati botatzera zihoala, Oihanari arkua puskatu zitzaion, golpe itzela hartu zuen bekokian, atzetik zetorren Kike ere larrituta gerturatu zitzaion. Azkenean, golpea, sustoa eta gutxienekoa, arkua puskatuta, bera ondo baitago. Orain arku hobeago baten txanda omen du Oihanak.

Gure taldekoetatik aipatu behar Iñakiren gorakada, eta Josebaren estreinuko tirada ona. Adrik ere asko disfrutatu zuen, eta ezin aipatu gabe utzi Rafa, bi gezi atera baitzituen 3 metroko alturatik bi zuhaitz desberdinetatik, bat gainera nirea zen...

Gauza bat garbi dago, disfrutatzeaz gain, puntuak igotzen joatea nahi badugu, gehiago entrenatu beharko dugula...

Arabako 3D Txapelketa

Atzo Legutianon jokatu zan Arabako 3D txapelketa. Bertan egon zan Iñakik kronika hau bidali dozt.

Arabako Basoko 3D arku-tiro txapelketaren kronika:

Goizeko 8retan urten geben Rafa, Intz, bere aita ta Miren (Intzen arreba txikia) bi kotxetan (Rafa ta ni baten eta familixia beste baten)
Nahiko goiz allau giñala esan bihar, ondiok muñeko batzuk jarteko eukain.
Betikuak agertu zian (Ordiziako pelotoia, Diarkokuak kon Sesma a la cabeza, Riojanuak eta lehen aldiz naparrak , Garridotarrak eta tradizionalian botaten dauen fenomenua). Saludau ta danak Mikeleatik galdezka, interrogante ......
Rekorridua oso polita, mendi aldera. Behaldera ezebe oinguan. Goiza oso freskua eta danak hotzaz akaboten, Diego riojanua izan ezik. Tiruak nahiko teknikuak, asko ankak aldaz beheran jarri bihar eta muñeko nahiko txikiñak edo medianuak. Distantziak ez oso luziak (luziena igual 35m). Eguzkixak be nahiko zailtzen eben tiruak, begitan jo eta ixa muñekoik ikusi ez, ni sufritten eta poleasak okerrau baina pleno itten.
Nahiko azkar akabo geben libren ibili giñanak, oinguan tradizionalak nahiko motel, ez dakit hotzak ereinda edo gogo faltiak gaizki botaten ebitzelako. Batek daki....... Egixa esan Rafa oso ondo bere arku barrixakin.
Beste alderdixan Intz hasi barrixa, nerbioso eta oso azkar botaten (48p azkenian). Pazientzia pittin bat biaku, tiempo al tiempo ?????
Ni be oso gaizki hasi nintzan baina azkenerako nere puntuazino mailan jarri nintzan (176p).
Danak bukaeran bokadillo ederra jan eta premixuen ostian danak etxera.
Hurrengo astian 28xan gehixau.

Ondo esaten dauen moduan, hurringo domekan gehixau, euskal liga hasten da!

Erakustaldiak egin ditugu

Larunbatean Angiozarren izan ginen, 2,5D animaliak eraman genituen, baserri batetik belar fardo batzuk ekarri zizkiguten babes bezala jartzeko, eta elizpean aritu ginen. Jente pilatxoa gerturatu zen, guztiak arkua hartu eta gezi batzuk botatzeko gogoarekin. Adin guztietako jentea, gure laguntzarekin hasieran eta gero bakarrik, denak gustura, gu ere baita noski, guk zer egiten dugun jenteari erakustea polita da, askok ezagutu ere ez baitute egiten kirol hau.

Igandean berriz Oñatiko plazako frontoian genuen hitzordua, belar fardorik ez genuen lortu, beraz lokaleko 2 parapeto erabili genituen, puxika mordo bat puztu, eta hauek puskatzen aritu ginen, lehengo gu, eta gero gerturatutako jentea, batez ere haurrak, nahiz eta helduren batzuek ere bota zuten, eta gustura geratu gainera. Zer pentsatua ematen du jente askok ez zekiela herrian arkutiraketa talde bat dagoela, uste dut orain gehiagok dakitela, eta ea horrela jarraitzen duen, jentea interesatuta ikusi genuen, eta gu gertu gaude kirol dotore hau zabaltzen jarraitzeko.

Erakustaldiak

Datorren asteburu hau berezia da guretzat, ostiralean herriko jaiak hasten dira, baita Angiozarkoak ere, eta bai Angiozarren bai Oñatin arkutiro erakustaldiak egingo ditugu, gure asmoa kirol hau ezagutaraztea da, ahal bada zaletu berriak kirol hau praktikatzen hastea bultzatzea.

Larunbatean Angiozarren, arratsaldeko 5etan, igandean berriz Oñatiko plazako frontoian 6etan. Ea ba jendea animatzen den ikustera eta gezi batzuk botatzen, gero agian gustatu egiten zaie gainera. Ziur gaude, herrian bertan jente askok ez dakiela arkutiro talde bat dagoela Oñatin.

Gipuzkoako 3D Txapelketa

Udako atsedenaldiaren ostean, itzuli da lehiaketarako ordua. Hitzordua Donostian geneukan, Diarcoren zelai-basoan. Aire libreko lehiaketak egiteko erabiltzen duten zelaiaren ondoan dagoen basoa txukundu dute bertaratu garen guztiok goiz pasa eder bat izateko, eta egia esan lortu dute.

Oñati aldetik Rafa, Iñaki eta hirurok joan gara, Oihanak berriz gurasoen animoak izan ditu ibilbidean zehar. Niri patruilan Mikel, Andres eta Agustin egokitu zaizkit, gustora botatzen da beti Andres eta Mikel bezalako jentearekin, Agustin berriz dianetara botatzen ohituago dagoen donostiarra, taldean dauzkaten irakasleekin basora gero eta gehiago ohitzen ari dena.

Ibilbidea nahiko motza izan da, basoak ematen duena, baina ondo aprobetxatua. Orokorrean tiro motzak izan diren arren, bazeuden tiro luze batzuk, eta eguzkiak aurpegian jotzen zuela bota beharreakoak, edo argi kontraste handiak zituztenak. Oso gustura aritu gara gure patruilan, giro onean, amaitzerakoan otartekoak gertu, eguraldi bikaina, zer gehiago behar da bada? Beharbada Oriok kontxako estropadan irabazi izanak borobildu du gaurko goiza!!

Zorionak Diarcoko jente guztiari, lan ederra egin duzuelako, eta nola ez, irabazleei!

Blanquefort

Asteburu honetan jokatu da Blanqueforteko nazioarteko lehiaketa, batez ere Frantzia, Catalunya, Euskal Herria eta Espainiako arkulariek hartu dugu parte bertan. Ziur ez dakidan arren, berrehundik gora izan gara.

Ostiralean irten genuen Oñatitik Mikel eta Iñaki, azken honen kotxean, eta ni nirean. Bergaran Oihana hartu genuen, goizez lana egin zuela, eta Ibanen zain geratu ginen, gure argazkilari ofiziala. Bergaratik irten orduko ia arratsaldeko 3ak ziren, kotxe pilatxo bat aurkitu genituen Blanqueforterako bidean, gainera bero handia egiten zuenez bidaia gogorragoa egin zitzaigun, Iñakiren kotxeak aire girotua duenez ez zitzaien horren gogorra egingo!

Arratsaldeko 6:30etarako dortsalak jasotzeko zain geunden, gure aurretik Azu eta Jose Manuel gasteiztarrak, denbora dexente egin zuten eta atzeko guztiak itxaron egin behar, tartean ordiziako jentea. Gu ordiziarrekin batera Euskadi talde bezala joan ginen, eta dortsala jasotzean sorpresa ederra hartu genuen, ikurriña geneukan izenaren ondoan, badaezpada ere pegatinak hartuak genituen arren. Euskal selekziokoek ere ikurriña zuten, baina bertan "Selección de Euskadi" gehituta. Indians-ak erosi, tabernan hauek estreinatu garagardo eta freskagarriak erosteko, eta kanping denda muntatzera abiatu ginen.

Han zeuden gasteiztarrak, kanpamentu handi bat ezarrita, ordiziar batzuek ere dendak jarri zituzten, gaztetxoenek aldiz Ilderen furgonetan egin zuten lo, Donostiako Diarcoko jentea ere han zegoen. Dena gertu zegoenean, taldetxo bakoitza afaltzen hasi zen, eta amaieran gasteiztarren kanpamentuaren bueltan jarri ginen guztiok. Berriketa apur bat, eta goiz samar oheratu ginen. Batzuk herrira joan ziren, hotelean egin behar baitzuten lo. Gau hontan ez zen zarata larregi egon.

Larunbatean goizeko 7retan altxatu ginen, gertatu ondoren kotxea hartu eta gosaltzera abiatu ginen Blanqueforteko "kanpo base"ra. Behin gosalduta, beroketa batzuk egin, eta bakoitza bere patruilaren bila. Nirekin Aitor gasteiztarra, bere alaba Haizea cady bezala eta Eric eta Norbert frantsesak. Giro onean ibili ginen, ibilbide txuria goizean eta gorria bazkalostean izan genituen. Teorikoki zailenak hauek ziren, baina ez da nire puntuazio txarraren arrazoia.

Arratsaldeko ibilbidea bukatu ondoren, oñatiarrok (eta angiozartarra) kanpingera itzuli ginen, izerdia eta usain txarra kentzeko dutxa bero bat hartu, eta berriz afaltzeko gune nagusira buelta. Afalostean 4x4 kotxetik tiroak zeuden, esan behar ilunduta zegoela, eta horrek apur bat zaildu egiten zuela. Gu ez ginen animatu botatzera, bakarrik Ordiziako gaztetxoak. Hauek amaitu zutenean lotara.

Igande goizean ere larunbatean bezala, goiz altxatu ginen, gosaldu eta ibilbideei ekitea. Patruilak aldatu egiten dira sailkapenaren arabera, eta oraingoan Jose Manuel eta Jorge euskaldunekin eta Jannick frantsesarekin nengoen. Goiz partean Iban gurekin etorri zen paparazzi lanak egitera, ibilbide bakoitza taldeko batekin egitean guztion argazkiak lortu ditugu. Jannickek ingelesez apur bat egiten zuenez ez dugu ulertzeko arazorik eduki. Larunbateko puntuekin konparatuz, izugarrizko gorakada izan dut, egia esan erreza zegoen, baina horrez gain gustura bota nuen, bi gezi galdu arren. Euria ere egin zigun, baina freskatzeko ondo etorri zitzaigun.

Ibilbideak amaitzean, sari banaketaren zain. Jaime elgoibartarrak bigarren amaitu zuen bere kategorian katalandar baten atzetik, eta ikusi beharra zegoen. Gainera Ansoalde bi anaiak eta Lander ere podiumera igo dira, ez dakit zenbatgarren podiuma duten gaztetxo hauek, baina honezkero ondo ohituta daude gora igoten! Podiumaren gainean, Espainiako eta Frantziako banderak, Jaimek esan duen bezala, datorren urterako ikurriña jartzea lortu behar dugu, dortsala lortu dugu (askori seguru ez zaiona batere gustatu), eta zergatik ez gehiago?

Bukatu denean, kanpin-denda desmuntatzera joan gara, gasteiztarrekiko agurtu (hauek gaur itzultzekoak ziren) eta martxa etxeruntz. Gaueko 12:30etan iritsi nintzen, ohean sartu eta haurtxo baten bezala lo egin dut. Orain oporrak ditugu alderdi guztietatik, hurrengo hitzordua Donostian izango da bertako basoaren estreinaldiarekin, han jokatuko baita Gipuzkoako 3D txapelketa irailaren 9an, han ikusiko gara!

Largoko pinudia

Orain aste batzuk, Largokua baserrikoek beraien izei pinudi bat erabiltzeko baimena eman ziguten, Rafaren bidez, bertako alaba baten senarra baita. Baldintza bezala jotzen genuen pinu bakoitzeko orkatz bat eraman behar geniela zen, momentuz ez dugu pinurik jo!!

Pinudia Oñatiko Garagaltza auzoan aurkitzen da, eta 2 hektarea ditu. Aurreko asteetan lanean aritu gara bertan, tiroak izango ziren lekuak garbitzen. Aste honetan berriz, lokalean genituen parapeto zatiekin parapeto txikiak sortu ditugu, 60x60cm-koak gutxi gora behera. Egur batzuekin lotu, eta ostiralean joan ginen pinudira hauek muntatzera. Guztira bost parapeto txiki jarri ditugu, baina leku desberdinetatik bota daitekeenez, tiro anitzak dira. Horrez gain beste bi irudi txiki egin ditugu zati txikienekin.

Momentuz entrenatzeko ondo dago, denborarekin orain arte garbitu dugun zatitxoaz gain beste baso zati batzuk garbitzeko asmoa dugu, eta diana gehiago jartzeko noski. Oraindik lehiaketa bat egiteko leku gutxiegi dugu, baina denborak hitzegingo du, gogoa behintzat etzaigu falta.

Basoaren argazkiak ikusteko, egin klik hemen.

Euskadiko Aire Libreko Txapelketako argazkiak

Federazioaren webgunean igandean jokatutako txapelketaren argazkiak ikusgai daude, egin klik hemen

Sailkapenak ikusteko berriz, egin klik hemen

Euskadiko Aire Libreko Txapelketa

Atzo jokatu zen Donostiako Aiete auzoan dagoen Bera-Bera rugby zelaian aurtengo Euskadiko Aire Libreko txapelketa. Oñatitik Mikel eta biok joan ginen lehiatzera, Oihana ikusle eta animatzaile bezala etorri zen. Goizean goiz jaiki, eta Donostiara abiatu ginen. Oñatiko auzo bateko jaiak izaki, etxeratzeke zegoen jentea ikusi genuen bidean, egia esan gaupasa egiteko gaugiro ederra zegoen...

Zumarraga inguruan Bergarako bi Fernando ikusi genituen, eta guk bidea zehatz ez genekigunez, beraien atzetik joatea erabaki genuen, Donostiako sarreran konturatu ziren atzetik zuten kotxean gu gindoazela...

Eguna oskarbi zegoen, bero egin behar zuela nahiko argi zegoen. Eguzkiarengatik babesteko krema apur bat eman, nahiz eta amaierarako erre egin ginen, eta beroketak egiten hasi ginen. Gehiengoa olinpiko eta poleadun kategorietan, tradizionalean berriz 4 biribilduan, bat longbowarekin eta infantil bakarra. Salamancako saria izan da asteburu honetan, eta Mercedesko jentea, normalean etorriko zirenak, han ziren.

Epaileen artean, basoan ikusi ohi ditugun Basur eta Pruden, Gallina ere hurrun gabe, eta argazkilari ofiziala Pedro, lehendakaria. Lehenengo 30 metrora bota genuen, nik gustura amaitu nuen. Parapetoak 18 metrora hurbildu, eta berriz hasi aurretik patata-tortila otartekoak ekarri zizkiguten, puntu positibo bat antolakuntzari, Euskadiko Federakuntzari, baina goizean zehar ur gutxi banatu zuten, eta ematen zuten aldiko kontatuta, bakoitzari boteilatxo bat. Egiten zuen beroarekin gehixeago egon beharko litzateke. Eskerrak aldageletan ura betetzeko aukera zegoela.

18 metrora botatzen hasi ginenean, lehiaketa gelditu zuten epaileek biltzar txiki bat egiteko. Lehiaketa goizean eta arratsaldean jokatzekoa zen, baina galerna aurreikusita zegoenez guztia saio baten egitea erabaki zen, horrela arratsalde partekoa hastekoa zenerako amaituko genuen. Tiraldi honetan ez nuen horren gustura amaitu, gertuago egon arren ez bainuen 30era bota nuen bezain gustura bota.

Gu finalerdietarako sailkatuta geunden, eta niri gero irabaziko zuenaren aurka egokitu zitzaidan. 3. eta 4. posturako lehian Cesar bizkaitarraren kontra egokitu zitzaidan, eta Mikel berriz finalera heldu zen Josebaren kontra lehiatzeko. Azkenean podiuma Joseba, Mikel eta hirurok osatu genuen. Lehenengo aldia da podiumera igotzea lortzen dudana, jentea faltako zen agian, baina lortutakoa hor geratuko da. Mikelek gainera 2 zilarrezko domina lortu zituen, senior mailakoa eta absolutua, eta azken horregatik diru saria ere bai.

Trasteak batu eta martxa, merkatal gune baten bazkaldu genuen, arratsaldeko 4:30ak izan arren. Orduan konturatu ginen gorri gorri geundela!!! Orain entrenatzea tokatzen da, pinudia ea aste honetarako gezi batzuk botatzeko moduan dugun, bi aste bakarrik falta dira eta hurrengo hitzordu garrantzitsurako, BLANQUEFORT!!! Han ikusiko gara!!

MERCEDES SARIA

Gaur jokatu da Larrabean Mercedes saria, eta han izan gara gure taldeko Oihana, Rafa, Mikel, Iñaki eta bostok. Gatzagan istripu bat izan da, eta lehenago joan den Oihanak abisatu digu Arlabandik pasatzeko. Iritsi garenean Yolik esan digu Ordiziako eta Donostiako arkulariak istripu baten erruz berandu etorriko direla, eta itxaron egingo diegula askotxo baitira.

10:10ean hasi gara, gaurko ibilbidea berria zen, pagadian izan dira tiro gehienak, gutxienak berriz pinudian. Nirekin Jose Manuel eta Justi gasteiztarrak, eta Ilde eta Katsu Ordiziako taldekoak. Nibel altua, batez ere azken bi hauek, amaieran lehenengo eta hirugarren gelditu baitira. Ibilbidea oso polita izan da, lastima euri apur bat egin digula hasieran, nahiz eta amaierarako nahikoa errespetatu digun. Tiro asko izan dira itzaletan, leku batzuetan oso ilun zegoen gainera.

Amaitzean elkarlekuan bildu gara guztiok, Sesma eta konpainiaren patruilaren zain egon gara sariak banatzeko, bitartean otarteko bikaina jan dugu. Mikel gaur ere podiumean, oraindik 3. postutik ezin izan du pasatu, baina iritsiko al dira postu hobeak? Ikusiko dugu! Gainera, sari bezala eman dizkioten 2 ardo boteilak oparitu dizkit, bere etxean ez ei du inork ardorik edaten, probatu egin beharko dugu...

Honen bidez, ZORIONAK Mercedes taldeko kideei, oso lan ona egin dutelako, eta aspaldian egin dugun ibilbide politena izateagatik!!!!

Euskadiko Aire Libreko liga

Gaur jokatu da Donostiako Diarco taldearen zelaian Euskadiko aire libreko 6. jardunaldia. Han izan gara Iñaki, Mikel eta hirurok. Lehenengo aldiz joan gara tiro zelai honetara, eta esan behar apur bat kostatu zaigula aurkitzea. Badaezpada txapel eta eguzkitako kremekin joan gara, baina zelako ezustea eraman dugun tiro lerroa gerizpean zegoela jakitean!!

FITA 900 modura jokatu da gaurkoa, eta guk 30, 18 eta 12 metrora bota dugu, aldiz olinpiko eta poleadunek 60, 50 eta 40ra. Tradizionalean Mikel eta biok aritu gara Diarcoko Mauri eta Mikelen aurka parapeto berean. Distantzia luzeenera seinaka bota ditugu geziak, gero hirunaka. Normalean tirada hauek asko luzatzen dira, baina giro ona izan dugu gure artean eta eramangarriagoa egin zaigu guztioi. Basoan gustura botatzen duen Sesma bere olinpikoarekin aritu da, honek era guztietan eta arku guztiekin botatzen du!! Nahiko gustura amaitu dut, hobetu daiteken ustearekin, nire suelta batez ere...

Zelaiari gerizpea ematen zioten zuhaitzek osatzen dute Diarcokoek baso ibilbidea muntatu nahi duten basoa, eta itxura nahiko ona dauka. Ea laister baso horretan "pelutxe" batzuei geziak botatzen dizkiegun! Guk ere pinuditxo bat erabiltzeko baimena lortu dugu, hasiera baten entrenatzeko ea balio digun. Noski, aurretik lan mordo bat egin beharko dugu, azkenengo 4 urte hauetan ez baitu inork garbitu.

Tirada amaitu, eta etxera itzultzean Urbil merkatalgunean geldialditxoa egin dugu, bertan kebapa afaldu, eta martxa. Bihar batzuk Errioxara joango dira, guretzako hurrengo lehia datorren igandean izango da Legutianon, bertan jokatuko baita Mercedes saria.

El Clan-en ataratako argazkiak

Egin zuen eguraldi eskaxaren ondorioz, argazki gutxi atera nituen, kamera busteko gogorik ez baineukan!!

Argazkiak ikusteko, klik gainean.

Hurrengorarte!

Euskadiko 3D txapelketako Argazkiak

Iñakik bidali dizkidan argazki batzuk ikusteko aukera dago.

Egin klik gainean.

Madrilen liga nazionalean ateratako argazkiak ea jartzen ditudan....

Euskadiko 3D Txapelketa

Atzo jokatu zen Gaintzan, Euskadiko 3D txapelketa. Oñatitik Iñaki, Mikel, Rafa, Oihana eta bostok joan ginen, Rafaren "minibusean". Iritsi ginenerako kotxe pilatxo bat zegoen. Eguraldia ere lagun izango genuela zirudien. Ezagunak agurtu, zertxobait berotu eta bakoitza bere patruiletara. Euskadiko Txapelketa abian zen.

Niri Mauri, Pruden, Justi eta Jose Marirekin egokitu zitzaidan, ia lehenengo aldia guztiekin. Patxik 2 eskopeta tiro bota zituenean hasi ginen geziak jaurtitzen. Tiro politak zeuden, gertu, urrun, hurrunegi bat edo beste, jeje. Bikoteka zeuden animaliak ere normalean baino gehiago. Ondo hasi nintzen, eta horrek animoa asko igoten du, oso gustura aritu nintzen goiz osoan zehar, aukeran hezetasun gehiegi zegoen, ugari izerditu egin genuen horregatik. Aurreko patruilan Oihanaren taldea zihoan, nahikoa katxondeo izaten genuen elkartzen ginen bakoitzean!

Amaitzean betikoa, otartekoa, eta sarien txanda. Ordiziako taldekoak izan ziren nagusi podium ezberdinetan, aipatzekoa Mikelek (Gallinaren baimenaz) arku librean lortu zuen hirugarren postua.

Zorionak Ordiziako taldekideei egindako lanagatik, ibilbidea oso polita baitzen (ez dakit zer gertatuko zen euria egin balu), zorionak halaber txapeldunei, bai ligakoei bai Euskadikoei, eta zorionak Ama Naturari, tirada baten eguraldi ona emateagatik!!

Liga Nazionala Madrilen

Igande honetan Alcalá de Henaresen liga nazionaleko 5. jardunaldia jokatu da, jokatzekoa zen behintzat, ez baitzen amaitu.

Larunbat bazkalostean irten genuen Oñatitik Iñaki, Mikel eta hirurok, egia esan nahiko giro ona zegoen hemen, baina Madrilera gerturatzen gindoazela zerua gero eta beltzagoa zegoen, Somosierra inguruan izugarrizko ekaitza harrapatu genuen. Arazo gabe heldu ginen Alcalara, baina hotelera joateko ondoko merkatalgunean bira pare bat eman behar izan genituen, ez baitzegoen guztiz ondo seinalizatuta. Hoteleko harreran neska bat eta mutil bat, neskak 20 minutu itxaroten eduki gintuen, ez baitzuen gure erreserba aurkitzen, eta mutila berriz galduta zegoen, ez zekien zer egin behar zuen ere. Pedro, Encarna eta Iriarte nafarrak ikusi genituen hotelera iristeaz bat, eta hauek azaldu ziguten El Clan talderako bidea.

Trasteak gelan utzi ostean, El Clan taldearen bilgunera joan ginen, ia Mejorada del Camporaino iritsi ginen, bidegurutzea atzean utzita, eta berriz itzultzeko beste buelta luze bat. El Clan taldekoek harrera bat gertatu zuten bertaratutako arkulari guztientzat, eta gu berandu samara iritsi ginen, ordurako ia jende guztia bazihoan. Hala ere, barbakoan gertatutako saltxitxa eta hirugiharra gustura jan genituen, sangria freskoarekin lagunduta. Guztien artean zegoen urduritasuna, eguraldi eskasa baikenuen momentu horretan ere, eta iganderako beldur ziren.

Hotelera bueltan, merkatalgunean paseatu genuen, izozki bana janaz. Ondoan genuen Buffalo Grill tabernan garagardo pare bat eta freskagarri bat eskatu, eta euskaldunen ohiturari eutsi genion, barraren aurrean jarrita. Goiz oheratu ginen, 6:15 aldean esnatzeko. Gosaltzera abiatu ginenean jantokia beteta zegoen, baina lekutxo bat aurkitu genuen guretzako.

El Clan-eruntz abiatu ginen, euria geratu gabe ari zen. Goiz iritsi ginenez, kotxe barruan itxarotea erabaki genuen, zertarako alperrik busti! Azkenean kotxetik irtetzea erabaki genuen, arkuak muntatu eta tabernara, han zeuden beste arkulari batzuk. Aterpetxo baten azpian, jente guztia berotzen, baina etzegoen guztiondako lekurik, haseratik busten. Eskerrak Iñakik aterki bat utzi zidala, bestela...

Patruilak biltzeko deia egin zuten, nirekin batera Irune aretxabaltarra, Ruben errioxarra, eta Ruben madrildar-avilarra. Gaztela Leongo Luis bat etortzekoa zen, baina antza denez eguraldi txarrak etxean gelditzea bultzatu zuen. Lokatza pila bat bidean, euria bota eta bota, eta hasi ginen gure ibilbidearekin, horia tokatu zitzaigun lehenengo egiteko. Tiroak oso politak, lekua ederra, baina egiten zuen euriarekin, bideetan errekak sortu ziren, lurra oso labainkorra eta biguina zegoen. Amaitzen ari ginela antolakuntzakoak etorri ziren tirada bertan behera gelditzen zela oihukatuz. Guri 3 diana falta zitzaizkigun, eta amaitzea erabaki genuen, nahiz eta ez zuten uzten hori egiten. Tentu handiz bota genituen azkenengo 3 dianetako geziak. Ni oso gustura aritu nintzen, gezi gutxi joan ziren kanpora, bizikleta bakarra egin nuen gainera. Lastima gero diana batzuk kendu egin zituztela puntuazioak kontutan hartzeko.

Jentearen aurpegia ikusteak nahikoa esaten zuen. Ibilbide zuria egin zutenek azaldu zutenez, ezinezkoa zen han ibiltzea. Antolakuntzakoak berriz, ia negarrez. Lan bikaina egin zuten, baina eguraldia ez dago gure esku, eta huts egin zigun!

Otartekoa jan, gertatu zizkiguten opariak jaso, kirol-poltsa bat, kamiseta bat, bidaiarako trivial joku bat, El Clan taldeko pina, eta sakelakoan jartzeko fanta boteilatxoak, jentea agurtu eta martxa. Aranda de Dueroko bideko zerbitzugune baten jateko gelditu ginen eta 6:30etarako etxean geuden. Zapore gazi-gozoa utzi digu tirada honek, ea datorren igandean Ordizian jokatuko den Euskadiko 3D txapelketan bestelakoa den.

SAN ADRIAN

Atzo jokatu zen San Adrianen, (Nafarroa) Espainiako Basoko 3D liga nazionaleko 4. jardunaldia. Gure taldetik Iñaki, Mikel eta Rafa izan ziren, kronikatxoren bat espero dugu hemen, e Iñaki???

Sailkapenak ikusteko.

Hemen doia Iñakin kronikia...

Epa Gorka, hemen xoiak atzoko kronika madarikatua, etxok asko eskribitteik merezi baina.

Goizeko seiak laurden gutxitan Mikel jauna jaso bere maletin ta guzti (maleton porzierto) eta urten ginan naparru aldera. Rafa etxian gelditu zan auzo lanian ibili ondoren kantsauta omen euen (Esas juergas Rafa!!!!). Ondo armozauta eta km-ak itteko goguakin (bizikletan ez hori beste egun bateako). Beasain-Etxegarate-Etxarri

-Lizarraga-Estella eta azkenik San Adrian herrira allau ginan (por zierto oso ardo ona itten omen daue, segun mi tio Mari).

Herrixa alde batea itxi eta kanpusantu aldea jo ta han euzen danak (betikuak eta ez ain betikuak).
Lekuan itxurosua, mahastixen aldamenian. Kotilleo por aki y por alla eta tiradia 9xak aldea hasi zan.
Mikel bi neska katalan zoragarrixekin (nahiko lotxauta nere ustez) hasi zan en plan figura (hau erakutsi .....). Ni berriz Olatz (Mikel Genuan alaba) eta Fernando mañuakin (pero maño maño, olatzek berriz napar batekin konfundiu eben). Todo un kaxeriko hablando.

Rekorrido gorrixa goizian in geben eta urdina arratsaldian bokaillo ostian. Animalixak nahiko distantziara, haundixak eta asko aldaz goran edo aldaz beheran, nahiko teknikuak haizian kulpaz baina tirada errexa nere ustez. Gero puntuaziñuak etzian halakuak izan baina bueno.
Nere tiradia oso eskaxa (se me ha olvidado tirar). Lotsa ta dana emuten dost arkerua naizela esatia (ni anklaje, ni suelta, ni brazo de arco). Hori dana goiz ta arratsalde. De pena, ke vamos a hacer.................. Ni Olatzekin ibili nitzan kanpeonatua itten, ea zeinek fallo gehixen edo puntu gutxiago ein. Bera gaizki eta ni berriz okerrau. Azkenian barre ta dana , ni verguenza..........

Mikel goizian gustoa (puntuak ikusi besterik ez dau) ta arratsaldian eskax.

Hasi ke hori izan zan dana.
Beste barik eta Madrideako asuntua pentsaitteko hor egonik (esos ke ya no van a tirar...) badakozue irakurteko artikulotxo bat.


Hala laster arte (Me voy a meter periodista), lastima kamaria eruan eta argazki txatxu bat eta be ez.

EUSKAL LIGAKO 4. JARDUNALDIA

Atzo jokatu zen Larrabean basoko Euskal Ligako 4. jardunaldia, Oñatiko taldetik Mikel eta Iñaki izan ziren eta azken honek esan didanez animalia txikiak hurrun, eta handiak normalean baino gertuago kokatuta zeuden. Iñaki gertu badago kronikatxo bat idazteko, badaki zer egin behar duen, ;)))

Orain Euskadiko txapelketa, eta baten batzuek Liga nazionaleko azken bi jardunaldiak eta besteren batzuk gertatu beharko ditugu.

SAN PRUDENTZIO SARIA

Asteburu honetan Legutiano saria jokatu da Larrabeako basoan, atzo arratsaldean eta gaur goizean izan dira lehiak. Oñatitik Rafa, Mikel, Iñaki, Oihana eta bostok egon gara. Rafak atzo bakarrik bota zuen, Mikelek atzo eta gaur, baina lo egitera etxera etorrita, eta beste hirurok gaua kanpin dendan igarota.

Basoa ezaguna dugu honezkero, antolatzaile lanetan Gasteizko ArkuLagunak taldea aritu da, baina muntatze lanak Mercedes taldeak egin ditu. Niri patruilan Basur, Txus eta Katsurekin egokitu zait, bi egunetarako patruila berdinak izan dira. Normalean Legutianon jokatzen den ligako jardunaldietako ibilbidearekin alderatuz, zerbait desberdinagoa izan da. Tiroak politak eta bi egunetan antzeko ibilbideak baina detaile txiki batzuk aldatu dituzte, animalia urrundu edo hurbildu, piketekin jokatu,...

Atzoko ibilbidea amaitzerako, antolakuntzak gertu zuen kafea nahi zuten guztientzako, eta gauerako guztiontzako afaria, hasieratik partehartzaile kopuruari tope bat jarri zioten, eta uste dut ez ginela iritsi hori betetzera, 30 inguru elkartu ginen azkenean. Afalostean Mus txapelketa eta hainbat karta joku eduki genituen, oheratzean gehiengoa kanping dendetara abiatu ginen, banaka batzuek parrandan jarraitu zuten, eta hauek oheratu zirenean lo antzean geuden ia guztiok itzartu ginen, izugarrizko zalaparta atera zuten eta.

Gaur goizean bart eginikoak aurpegietan igartzen ziren, banaka batzuk ez geunden botatzeko egoera onenetan, batzuk hobetoxeago, besteak okerxeago. Nik ez dut beste batzuen beste igarri, baina ez zen geziak jaurtitzeko egoera onena, baina ez dut gehiago esango...

Esan behar bi egun hauetako ibilbideen emaitzak batu dituztela sailkapen orokorrak ateratzeko, eta antolakuntzak izan dituen nahaspen batzuengatik arazotxo batzuk izan dira sari banaketan, baina zuzendu ostean hor etorri da gure taldearentzako berri ona, Oihana bere mailan hirugarren sailkatu da eta sari eta guzti itzuli da etxera. Sari banaketaren ostean bazkaria izan dugu guztiok antolakuntzak hortarako gertatutako karparen azpian. Eta bazkalosteko "tertulia"ren ostean, etxeruntz, ongi merezitako atsedentxoa hartzeko asmoarekin.

Datorren igandean hurrengo hitzordua, basoko Euskal Ligaren 4. jardunaldia asteburu honetako baso berean.

BASOKO EUSKAL LIGA, 3. EMANALDIA

Atzo jokatu zen Larrabeako pinudian, Basoko 3D Euskal Ligako 3. jardunaldia. Oñatitik Oihana, Iñaki, Mikel, Rafa eta bostok joan ginen, azkenaldian bezala. Errepideak garbi zeuden, baina behin Gatzagara heldu orduko paisaia zuria zen nagusi, astean izandako denboralearen aztarnak. Kotxeak aparkatzeko Golfeko aparkalekua erabili genuen, normalean kotxeak uzten ditugun aldea elurrez beteta baitzegoen. Han zegoen goiztiar ugari, eta barruak berotzeko kafetegira abiatu ginen, eta ordua baino beranduago ireki zuten.

Normalean errepide kontran izaten da hasierako kontrola, baina oraingoan pistaren amaieraraino joan behar izan genuen, denboraz oso ondo ez genbiltzanez ibilaldia hasteko agindu ziguten, kontrola ibilbidea egiten ari ginen einean izango zela jakinaraziz. Nire eskua ondo dago, baina oraindik ez dut uste indar nahikoa duenik, beraz hastapeneko arku batekin bota nuen, nire lehenbiziko arkua izan zena.

Patruilan Sesma, Carlos, Jacinto, Agus eta bostok. Paisaia zoragarria zen, eta tiro politak ere bazeuden, batzuen gusturako hurrunegi zeuden animalia txikiak, gainera gehiengoa zirela esango nuke handiekin konparatuz. Puntuei dagokionez, oso maila baxua orokorrean, zailtasunaren erakusgarri. Niri dagokidanez, hobeto botako nuen agian hasi aurretik zerbait entrenatu banu, baina ez da aitzakia.

Elurra berna erdiraino geneukan leku batzuetan, eta garrantzitsuena oinak ez bustea zen, neri busti ez baina hotzitu egin zitzaizkidan, amaitzean gustura jantzi nituen zapatilak. Noski, otarteko ederra eman ziguten bakoitzari, normalean goizeko onena izaten da, baina oraingoan Oihanak aurreko egunean gertatu zuen salda hobea izan zela esango nuke. Goizean lehenxeago jaiki zen berotu eta termoan sartzeko, guk ez genuen Ordiziakoen antzera kanping-gasik eraman eta!!!

Emaitzak ikusteko egin klik hemen.

Hurrengoa, guretzako behintzat, Legutianon izango da berriz ere, apirilaren 14 eta 15ean, San Prudentzio saria.

BASOKO EUSKAL LIGA, 2. JARDUNALDIA

Igande honetan jokatu da Gaintzan Euskal Ligako 2. jardunaldia. Ihauterietako igandea izanik, eta euria botatzen zuen bezela botata, izena emanda zeuden guztiak ez ziren agertu. Jendeak esango du zoratuta gaudela, egiten zuen eguraldiarekin ohean hobeto egoten dela edo dena delakoa, baina gauza bat garbi dago, gustuko tokian ez dagoela aldaparik!

Niri "Cady" bezala joatea egokitu zitzaidan, eskua igeltsuarekin edukita ezin ba bota. Oñatitik bostkotea joan ginen, Rafa, Iñaki, Mikel, Oihana ta idazten ari den hau. Rafaren minibusean, hau da, monobolumenean joan ginen. Urari aurre egiteko denok ere ondo gertatuta.

Oihanaren patruilan joan nintzen, Yoli, Irune eta Anarekin batera, normalean patruilak ez dira mistoak izaten, beraz aukera ona izan nuen emakume hauen maila ikusteko, nahiz eta aurreko baten Irunerekin batera bota. Euria goiz guztian, batzuetan gutxiago, bestetan gehiago, ni gutxien bustiko zena izango nintzen, aterkiarekin bainindoan, eta ez botatzeak ere laguntzen du lehorrago egoten. Nabarmentzekoa patruilako umore eta elkarren arteko giro ona, euria egitea ez zen horren kalterako izan, agian hoberako.

Harritzekoa Oihanaren tiraldia, bigarren aldia izateko oso ondo moldatu baitzen, lehenengoan baino askoz puntu gehiago eginaz. Eta ezin aipatu gabe utzi Katsuk egin zituen 250 puntuak, elitea da hori!!

Atzo daktilera, brazalera eta halakoak lehortzeke zeuden antza, euri asko egin zuen seinale.

- Sailkapenak
- Argazkiak

3. jardunaldia martxoaren 25ean Legutianon, ea ordurako botatzeko moduan nagoen.

EUSKADIKO ARETOKO ARKUTIRAKETA TXAPELKETA

Pasa den asteburuan jokatu da Gasteizen Euskadiko Aretoko Txapelketa, bertan gure taldetik Mikel izan genuen, eta nahiko ondo egin zuen, larunbateko kortea pasatu baitzuen. Igandean aldiz txapeldun izan zenaren aurka galdu zuen lehenengo kanporaketan, zerbait larritu ei zuen txapelduna. Aipatzekoa da basoko lehiaketatan poleadun arkuarekin botatzen duela gure Mikelek, eta aretoan aldiz tradizionalean, arraro samarra da, baina zer egingo diogu.

Hemen daude txapelketako emaitzak eta argazkiak: Euskadiko Txapelketa

Datorren igandean Basoko Euskal ligako 2. jardunaldia Gaintzan, han izango gara.

SAN SEBASTIAN SARIA

Igandean, hilaren 14an, jokatu zen San Sebastian Sariaren 2. edizioa Gaintzan. Han izan ginen gure taldetik Mikel, Rafa, Iñaki, Oihana hasiberria eta ni. Eguraldi zoragarria egiten zuen basoan ibiltzeko, nahiz eta hotz gehiago egingo zuela ematen zuen goizean.

Normalean Euskal Ligan egiten den ibilbidearekin alderatuz, desberdina zen, basoan larregi sartu gabe. Tiroak ez ziren oso konplikatuak. Gure patruilan, Antonio, Jon eta hirurok ginen, Antonion semea etortzekoa zen, baina ohean geratu zen sukarrarekin antza. Ez ginen fin hasi, Jon bai, eta amaierarako zerbait itxuratu genuen, hala ere normalean baino baxuago aritu ginen.

Sailkapena egiteko guztiok batera kontatzen genuen, modalitate bakoitzean aurrez kalkulatutako batazbesteko bat biderkatu behar zitzaion, horrela gauzak 3 pertsonako 4 talde egin zituzten, lehenengo 12 sailkatuekin, eta hauek taldeka egin zuten 4 animaliri botata bakoitzak, honekin kiniela antzeko bat zegoen, talde irabazlea eta puntuak ahalik eta gertuen igartzea zen kontua. Jente asko ez zen konturatu zela zen honen funtzionamentua. Otartekoak ia taldekako lehia amaitzen zihoala banatu zituzten, eta banaka bat baino gehiago gosez amorratzen zegoen, gu tarteko, ordu horietan ondo etortzen da benetan. Nire ustez, eta beste askorenean ere bai, otartekoa da igande hauetako gauzarik onena, egun ona pasatzeaz gain.

Zorionak Ordizia taldekoei horrelako lan ona egiteagatik, otsailean elkar ikusiko dugula espero dut Euskal Ligako 2. jardunaldian. Sailkapenik ba al dago interneten jarrita?

Ehiztari ehizatua

Basoko 3D ibilbidetan, animaliak foamezkoak dira, eta ez dira mugitzen noski. Baina arkulari batzuek modalitate hau ehizarako entrenatzeko erabiltzen dute. Espero dut halakorik ez zitzaizuela inoiz gertatuko!! Ez nuke nahi gizon honen lekuan egotea!!