Monday, December 18, 2006

ATZOKO GIPUZKOAKO ARETOKO TXAPELKETA

Atzo ospatu zen Gipuzkoako txapelketa Oñatiko Zubikoa kiroldegian, guretzako lanak larunbatean hasi ziren arren, Donostiraino kamioi baten traste guztien bila, gero Gaintzan geldialdia tradizionalean bota behar genuenontzako animaliak hartzera, kiroldegiko armairuan utzi hau guztia, bidegurutzeetan kartelak jarri eta gero inoiz amaitzen ez zela zirudien saskibaloi partidaren ostean iganderako guztia prestatzera.

Atzo kiroldegira iristean, jente guztia barruan zegoen, baina ez zieten kantxarako atea zabaldu, horrek atzerapen bat ekarri zuen. Tabernaruntz dagoen aldean, arku biribildunak, gero poleadunak eta azkenik tradizionalekoak. Dianetara botatzen zutenek, aldiko 3 gezi jaurtitzen zituzten, guk aldiz 2, eta 2 minutu guztiontzako, guretzako denbora larregi, ia-ia aspertzeko astia genuen!! 2 minututan han zeuden 4 animaliei bina gezi botatzeko astia genuen kasik, eta bestaldean berriz 2 minutuak guztiz agortzen 3 gezi botatzeko, horietako bat basoan ere ikusten dugun Sesma, honek arku mota (poleadunak ezik) eta txapelketa guztietan botatzen du, hori da meritua hori!!

Gu txantxetan aritu ginen bitartean, prezisioko arkulariak kontzentratuta eta serio. Gure taldeko ordezkaritza modalitate bakoitzean zegoen, poleadunetan Kandi eta biribilduan Rafa, ni aldiz tradizionalean. Gure maila ez da altuenetakoa, eta ezin izan genuen inork ere lehenengo sailkapen fasea pasatu. 2. fasea hasi aurretik, guztiok tabernara igo genuen, salda, patata tortila eta txorizo pintxoak zain geneuzkan, jente guztiak eskertu zituen, gainera ordu horietan edozer sartzen da ondo!!

Modalitate bakoitzeko txapeldunak hauek izan ziren: Miguel Urkia biribilduan, Juan Mari Urretabizkaia poleadunean, eta Ilde Sanchez tradizionalean. Emaitza osoak ikusteko:
- Sailkapen saioa
- Haurrak
- Azken emaitzak

Amaitzean, korrika eta presaka guztia batu eta soziedadera joan ginen bazkaltzera oñatiarrak. Balantze positiboa egin genuen, 64 arkulari, maila ona eta eskertutako lana. Hurrengo baten basoko ibilbideren bat antolatu beharko dugu, denboralditxo baten behintzat aretokorik ez bait dugu berriz egingo, lan asko da eta beste talde batzuk ere badaude.

Monday, December 11, 2006

GIPUZKOAKO ARETOKO TXAPELKETA

Datorren igandean, hilaren 17an Gipuzkoako Aretoko Txapelketa ospatuko da Oñatin, Zubikoa kiroldegian, Gipuzkoako Arkutiraketa federakuntzaren laguntzarekin. Aurtengo saioak berrikuntza batzuk dauzka, era tradizionalean botatzen duten arkulariek, 3D dianetara botako dute, asko jota 16 arkularirentzako egongo da horrela botatzeko aukera. Prezisioan botatzen dutenek aldiz, ohikoa bezala diana bertikaletara botako dute.

Txapelketan parte hartzen duten guztientzako hamaiketako bat egongo da kiroldegiko tabernan, gutxi gora behera 12ak inguruan, saioaren atsedenaldian hain zuzen ere. Beraz jente guztia gonbidatuta dago parte hartzera edo bestela ikustera. Gogoratu gaur dela azkenengo eguna izena emateko. Informazio gehiago federakuntzaren orrian.

Iganderako markatuko ditugu kiroldegira iristeko bide egokienak, beraz adi bidegurutzeei. Zuen zain egongo gara igandean.