Xixon, Liga nazionala

Aurreko igandean jokatu zen Xixonen aurtengo basoko 3D Liga Nazionaleko 2. ekitaldia. Gure taldetik Oihana, Iñaki eta hirurok joan ginen, beste 17 gipuzkoarrekin batera, 16 Ordiziako taldekoak eta Sesma Diarcokoa. 4 kotxetan abiatu ginen larunbat goizean Bergaratik. Torrelavega inguruan geldialditxoa, kotxeetan ezin zutenak erre, erreta zigarro bat erretzeko amorruz, beste batzuk komunera joateko gogoz aldiz.

Xixonera ordu biak jota heldu ginen, baina hotelera heldu ezinda ibili ginen, GPSak arazoak ei zituen. Hotelean instalatu, bakoitzak bere gela hartu, eta behean genuen hitzordua bazkaltzera joateko. Nahiko gertu aurkitu genuen Fernandinek gomendatutako Sagardotegia, ez da Astigarragakoen bezalakoa, taberna baizik, eta 20 pertsonentzako lekua edukiko zutela, baina itxaron egin behar genuela. Bitartean sagardoa edan, eta itxasoko kirikiñoak atera zituzten pikatzeko, egia esan ez zuten oso itxura onik, zaporea ez dakit, agian Sesmak esango digu hobeto...

Bapo bazkaldu ostean autobus bat geneukan Xixonen ibilbide turstikoa egiteko, ia autobusetik irten ere ez ginen egin, eta Oihanak zioen bezala, japoniarrak ginela ematen genuen! La Camocha Xitia taldearen entrenamentu lokala jantoki bihurtu zen, bertan "espicha" eduki genuen, apur bat danetik jateko, eta sagardoa edateko, bai botilatik bai kupelatik. Amaitzean batzuk kalean geratu ziren, gu berriz lo egiten saiatzera, bero larregi logelan, eguerdiko fabada bere eraginak egiten...

Igande goizean 7retarako gora, gosaldu eta 8:30etarako tiro zelaian egoteko, ordu eta erdi pasako atzerapena eduki genuen, oso geldo joan zen materialaren errebisioa. Patruilan jente jatorra egokitu zitzaidan, aurreko baten Ordizian nireki batera bota zuen Luis kantabriarra, Alvaro naparra, Pedro andaluza eta Jorge madrildarra. Giro ona eduki genuen, bai geure artean eta baita zeruan, euri tantatxo batzuk bota zituen, baina ez zuen gehiagora egin. Basoa izateko asko falta zuen ibilbideak, parke bat baitzen, eta belarretan geziak galtzeko beldurrak edo egun txarra izateak ez zuten batere lagundu puntuazioan, nirean behintzat.

Xixondik arratsaldeko 6retan abiatu ginen etxeruntz bueltan, joaterazkoan ez bezala bidaia luzea egin zitzaigun, baina buruan oroitzapen onak ekarri genituen, momentu onak izan baitziren nagusi.

Hemen daude argazkiak.

Ugartondoko argazkiak

Hemen daude larunbatean Ugartondo ateratako argazkiak:

argazkiak

Euskal Liga, 2. jardunaldia

Gaur jokatu da Gaintzan aurtengo Euskal Ligako 2. jardunaldia, haize bortitza izan da protagonista nagusia Ihauteri Igande honetan.

Oñatitik jente pilatxoa joan gara, Joseba, Intz, Iñaki, Mikel, Rafa, Oihana eta seirok botatzera, eta Koldo eta Josebaren aita ikustera berriz. Oihana eta biok mozorrotuta, Lady Marion eta Robin Hood, eta ez gara bakarrak izan, Diarcoko taldetik 3 orein eta untxi bat, indio bat, pailazo bat, munstro bat, marroki bat ikusi ahal izan ditugu besteak beste.

Patruilan 3 Diarcoko, Felix, Urko eta Iñigo, Gezaleriakeko Txema eta bostok. Urko eta Iñigorentzat 1. basoko esperientzia, Txemarentzat 2.a berriz, Felixek eta biok erabaki dugu bi mutiko hasiberriek apuntatzea, beraien mesedetan, ikasten joan daitezen, baina esperientzia ezak asko geldiarazi gaitu, eta gure atzekoak, nesken patruila, gainean izan dugu, Felix eta biok apuntatzen hasi eta erritmoa apur bat bizitu dugun arte.

Lokatzara ugari, zorua oso labainkorra, batenbat oinetako ezegokiarekin ere joan da, gero lurretik bueltaka ibili da. Maldak igotzeko soka lagungarri, eskerrak, eta tiroak politak, zailtasun puntuarekin. Nik oso ongi pasatu dut, puntuak hobe ez aipatzea, nahiz eta uste dudan orokorra izan dela puntu gutxi egitea. Eskerrak euririk ez duela egin, gero arratsaldean egin duen bezala, bestela...

Guretzako hurrengo hitzordua ez da Larrabean izango, ezta Gaintzan ere, hurrunago baizik, Xixonera joango gara gauzak ez badira okertzen behintzat, otsaileko azkenengo asteburuan Liga Nazionaleko 2. jardunaldian parte hartzera.

Basoko tirada Oñatin

Atzo eguerdiko ordu 1ean elkartu ginen lokalean, Rafak baso baten tiradatxo bat egiteko baimena lortua zeukan aurreko astean, eta animaliak eta arkuak kotxetan sartu eta basoruntz abiatu ginen. 3D eta 2Dko animaliak pilatu genituen, guztira 20, gaurko ligako tiradarako entrenamentu saio bezala. Arratsalde ederra pasatu genuen, goizean egindako euri guztiaren ostean bertan behera uzteko idea ere pasatu zitzaigun burutik, eta eskerrak aurrera egin genuela.

Rafa, Enaitz, Iñaki, Intz, Adri, Joseba, Koldo, Lander, Oihana eta ni neu aritu ginen geziak jaurtitzen, ez geneukan tiro luzerik, denbora gutxirekin aritu ginen eta baso zati txiki batean jarri genituen animaliak. Diana mugikor bat eta guzti jarri genuen! Haurrak pozik, helduak ere gustora, gezi batzuk basoan utzi genituen arren, arratsalde borobila! Iluntzen ari zela amaitu genuen jasotzen, hurrengorako goizean elkartu beharko gara.

Eguna borobiltzeko Zañartun afaria, bertan sukaldari lanetan Lierni ari zen, eta Mikel eta Ioritz ere batu zitzaizkigun. Hurrengo batean basoa zerbait garbitu eta ea gezi galduak aurkitzen ditugun, eta gure asmoa jende guztiari zabaldutako tirada bat egitea da, ikusiko dugu lortzerik dugun.

Iñakiren argazkien zain ixten dut post hau.